திருச்சிற்றம்பலம்
சோதியே சுடரே சூழ்ஒளி விளக்கே
சுரிகுழல் பணைமுலை மடந்தை
பாதியே பரனே பால்கொள் வெண்ணீற்றாய்
பங்கயத்து அயனும் மால்அறியா
நீதியே செல்வத் திருப்பெருந் துறையில்
நிறைமலர்க் குருந்தம் மேவியசீர்
ஆதியே அடியேன் ஆதரித்து அழைத்தால்
அதெந்துவே என்று அருளாயே. (8)
சோதியே சுடரே சூழ்ஒளி விளக்கே: சுயம் பிரகாசமான ஜோதி வடிவானவனே! சுடராய் பிரகாசிப்பவனே! எங்கும் சூழ்ந்து விளங்கும் பேரொளி விளக்காய் திகழ்பவனே!
சுரிகுழல் பணைமுலை மடந்தை பாதியே பரனே பால்கொள் வெண்ணீற்றாய்: சுருண்ட கூந்தலையும் திரண்ட மார்பகங்களையும் உடைய உமாதேவியை உனது திருமேனியில் ஒரு பாதியாகக் கொண்ட மேலான பரம்பொருளே! பால் போன்ற வெண்மையான திருநீற்றை அணிந்தவனே!
பங்கயத்து அயனும் மால்அறியா நீதியே: தாமரை மலரில் வீற்றிருக்கும் பிரம்மனும் திருமாலும் தேடியும் உணர்ந்து கொள்ள முடியாத நடுவுநிலைமை மிக்க பரம்பொருளே!
செல்வத் திருப்பெருந் துறையில் நிறைமலர்க் குருந்தம் மேவியசீர் ஆதியே: வளம் நிறைந்த திருப்பெருந்துறையில், அடர்ந்த மலர்களையுடைய குருந்த மரத்தின் நிழலில் எழுந்தருளிய புகழமைந்த ஆதிமூலமே!
அடியேன் ஆதரித்து அழைத்தால் அதெந்துவே என்று அருளாயே: எளிமையேனாகிய அடியேன் உன்னை ஆசையோடு 'எம்பெருமானே' என்று கூவி அழைத்தால், 'என் மகனே, என்ன காரியம்?'என்று பரிவோடு வினவி அருள்செய்வாயாக!
நிருத்தனே நிமலா நீற்றனே நெற்றிக்
கண்ணனே விண்உளோர் பிரானே
ஒருத்தனே உன்னை ஓலம்இட்டுஅலறி
உலகுஎலாம் தேடியும் காணேன்
திருத்தமாம் பொய்கைத் திருப்பெருந்துறையில்
செழுமலர்க் குருந்தம் மேவியசீர்
அருத்தனே அடியேன் ஆதரித்து அழைத்தால்
அதெந்துவே என்று அருளாயே. (16)
நிருத்தனே நிமலா நீற்றனே நெற்றிக் கண்ணனே விண்உளோர் பிரானே: ஆனந்தத் தாண்டவம் புரியும் கூத்தப் பெருமானே! மலங்கள் ஏதுமற்ற தூயோனே! திருநீற்றை அணிந்தவனே! நெற்றியில் ஞானக்கண்ணை உடையவனே! விண்ணுலகத் தேவர்களுக்கெல்லாம் மேலான தலைவனே!
ஒருத்தனே உன்னை ஓலம்இட்டுஅலறி உலகுஎலாம் தேடியும் காணேன்: ஒப்பற்ற இணையற்ற தனிப் பரம்பொருளே! உன்னை அடைவதற்காக உரக்கக் கூவியும் அலறியும் உலகம் முழுவதிலும் தேடிப் பார்த்தும் அடியேனால் உன்னைக் காண முடியவில்லையே!
திருத்தமாம் பொய்கைத் திருப்பெருந்துறையில் செழுமலர்ச் குருந்தம் மேவியசீர் அருத்தனே: தூய்மையான தீர்த்தக் குளங்களைக் கொண்ட திருப்பெருந்துறை என்னும் திருத்தலத்தில், வளமான மலர்களைக் கொண்ட குருந்த மரத்தின் நிழலில் எழுந்தருளிய புகழ்பெற்ற மெய்ப்பொருளே!
அடியேன் ஆதரித்து அழைத்தால் அதெந்துவே என்று அருளாயே: எளிமையேனாகிய அடியேன் உன்னை பேரன்போடு 'எம்பெருமானே' என்று கூவி அழைத்தால், 'என் மகனே, அது என்னப்பா?' என்று பரிவோடு கேட்டு அருள்செய்வாயாக!
எங்கள் நாயகனே என்உயிர்த் தலைவா
ஏலவார் குழலிமார் இருவர்
தங்கள் நாயகனே தக்கநற் காமன்
தனதுஉடல் தழல்எழ விழித்த
செங்கண் நாயகனே திருப்பெருந் துறையில்
செழுமலர்க் குருந்தம் மேவியசீர்
அங்கணா அடியேன் ஆதரித்து அழைத்தால்
அதெந்துவே என்று அருளாயே. (24)
எங்கள் நாயகனே என்உயிர்த் தலைவா: எங்கள் எல்லோருக்கும் தலைவனே! என் உயிர்க்கு உயிராய் விளங்கும் தலைவனே!
ஏலவார் குழலிமார் இருவர் தங்கள் நாயகனே: மணம் பொருந்திய நீண்ட கூந்தலை உடையவர்களான உமாதேவி மற்றும் கங்காதேவி ஆகிய இருவருக்கும் நாயகனே!
தக்கநற் காமன் தனதுஉடல் தழல்எழ விழித்த செங்கண் நாயகனே: அழகுமிக்க மன்மதனின் உடல் தீப்பற்றி எரியுமாறு நெற்றிக்கண்ணைத் திறந்து விழித்து அருளிய, சிவந்த நெற்றிக்கண்ணை உடைய நாயகனே!
திருப்பெருந் துறையில் செழுமலர்க் குருந்தம் மேவியசீர் அங்கணா: வளம் நிறைந்த திருப்பெருந்துறை என்னும் திருத்தலத்தில், வளமான மலர்களையுடைய குருந்த மரத்தின் நிழலில் எழுந்தருளிய, புகழ்பெற்ற கருணைக்கண்களை உடையவனே!
அடியேன் ஆதரித்து அழைத்தால் அதெந்துவே என்று அருளாயே: எளிமையேனாகிய அடியேன் உன்னை பேரன்போடு ஆசையோடு அழைத்தால், 'என் மகனே, அது என்னப்பா?' என்று பரிவோடு கேட்டு அருள்செய்வாயாக!
கமல நான்முகனும் கார்முகில் நிறத்துக்
கண்ணனும் நண்ணுதற்கு அரிய
விமலனே எமக்கு வெளிப்படாய் என்ன
வியன்தழல் வெளிப்பட்ட எந்தாய்
திமிலநான் மறைசேர் திருப்பெருந் துறையில்
செழுமலர்க் குருந்தம் மேவியசீர்
அமலனே அடியேன் ஆதரித்து அழைத்தால்
அதெந்துவே என்று அருளாயே. (32)
கமல நான்முகனும் கார்முகில் நிறத்துக் கண்ணனும் நண்ணுதற்கு அரிய விமலனே: தாமரை மலரில் வீற்றிருக்கும் நான்முகனாகிய பிரம்மனும், கரிய மேகத்தின் நிறத்தைக் கொண்ட திருமாலும் அடிமுடி தேடி அடைவதற்கு அரிய, மலங்களற்ற தூயோனே!
எமக்கு வெளிப்படாய் என்ன வியன்தழல் வெளிப்பட்ட எந்தாய்: "எங்களுக்குக் காட்சியளித்தருள்க!" என்று தேவர்கள் வேண்டிக்கொள்ள, எல்லையற்ற ஜோதிப் பிழம்பாகத் தோன்றி அருளிய எம் தந்தையே!
திமிலநான் மறைசேர் திருப்பெருந் துறையில் செழுமலர்க் குருந்தம் மேவியசீர் அமலனே: வேதங்களின் முழக்கம் ஆரவாரமாக முழங்குகின்ற திருப்பெருந்துறை என்னும் திருத்தலத்தில், வளமான மலர்களைக் கொண்ட குருந்த மரத்தின் நிழலில் எழுந்தருளிய புகழ்பெற்ற குற்றமற்ற பரம்பொருளே!
அடியேன் ஆதரித்து அழைத்தால் அதெந்துவே என்று அருளாயே: எளிமையேனாகிய அடியேன் உன்னை பேரன்போடு ஆசையோடு கூவி அழைத்தால், 'என் மகனே, அது என்னப்பா?' என்று பரிவோடு கேட்டு அருள்செய்வாயாக!
துடிகொள் நேரிடையாள் சுரிகுழல் மடந்தை
துணைமுலைக் கண்கள்தோய் சுவடு
பொடிகொள் வான்தழலில் புள்ளிபோல் இரண்டு
பொங்கு ஒளிதங்கு மார்பினனே
செடிகொள் வான்பொழில்சூழ் திருப்பெருந் துறையில்
செழுமலர்க் குருந்தம் மேவியசீர்
அடிகளே அடியேன் ஆதரித்து அழைத்தால்
அதெந்துவே என்று அருளாயே. (40)
துடிகொள் நேரிடையாள் சுரிகுழல் மடந்தை துணைமுலைக் கண்கள்தோய் சுவடு: உடுக்கை போன்ற மெல்லிய இடையையும், சுருண்ட கூந்தலையும் உடைய உமாதேவியாரின் இரு தனங்களின் தழும்பு பதிந்த...
பொடிகொள் வான்தழலில் புள்ளிபோல் இரண்டு பொங்கு ஒளிதங்கு மார்பினனே: வெண்ணீறு பூசப்பெற்ற, பேரொளி வீசும் திருமேனியாகிய தீப்பிழம்பில் இரு புள்ளிகள் போல ஒளிர்கின்ற திருமார்வினை உடையவனே!
செடிகொள் வான்பொழில்சூழ் திருப்பெருந் துறையில் செழுமலர்க் குருந்தம் மேவியசீர் அடிகளே: அடர்ந்த மரங்கள் நிறைந்த மேலான சோலைகள் சூழ்ந்த திருப்பெருந்துறையில், வளமான மலர்களைக் கொண்ட குருந்த மரத்தின் நிழலில் எழுந்தருளிய புகழ்பெற்ற பெருமானே!
அடியேன் ஆதரித்து அழைத்தால் அதெந்துவே என்று அருளாயே: எளிமையேனாகிய அடியேன் உன்னை பேரன்போடு ஆசையோடு கூவி அழைத்தால், 'என் மகனே, அது என்னப்பா?' என்று பரிவோடு கேட்டு அருள்செய்வாயாக!
துப்பனே தூயாய் தூயவெண்ணீறு
துதைந்துஎழு துளங்குஒளி வயிரத்து
ஒப்பனே உன்னை உள்குவார் மனத்தில்
உறுசுவை அளிக்கும் ஆரமுதே
செப்பமா மறைசேர் திருப்பெருந் துறையில்
செழுமலர்க் குருந்தம் மேவியசீர்
அப்பனே அடியேன் ஆதரித்து அழைத்தால்
அதெந்துவே என்று அருளாயே. (48)
துப்பனே தூயாய் தூயவெண்ணீறு துதைந்துஎழு துளங்குஒளி வயிரத்து ஒப்பனே: பவளம் போன்ற சிவந்த திருமேனியினனே! தூய்மையானவனே! தூய வெண்மையான திருநீற்றை உடலில் நிறையப் பூசியதால் பிரகாசித்து விளங்கும் ஒளிமிக்க வைரத்திற்கு ஒப்பானவனே!
உன்னை உள்குவார் மனத்தில் உறுசுவை அளிக்கும் ஆரமுதே: உன்னை அகத்தில் நினைந்து தியானிக்கும் அடியார்களின் மனத்தினுள்ளே மிகுந்த தித்திப்பைத் தருகின்ற அரிய அமுதமாய் விளங்குபவனே!
செப்பமா மறைசேர் திருப்பெருந் துறையில் செழுமலர்க் குருந்தம் மேவியசீர் அப்பனே: செம்மையான சதுர்வேதங்களும் முழங்குகின்ற திருப்பெருந்துறை என்னும் திருத்தலத்தில், வளமான மலர்களைக் கொண்ட குருந்த மரத்தின் நிழலில் எழுந்தருளிய புகழ்பெற்ற எம் தந்தையே!
அடியேன் ஆதரித்து அழைத்தால் அதெந்துவே என்று அருளாயே: எளிமையேனாகிய அடியேன் உன்னை பேரன்போடு ஆசையோடு கூவி அழைத்தால், 'என் மகனே, அது என்னப்பா?' என்று பரிவோடு கேட்டு அருள்செய்வாயாக!
மெய்யனே விகிர்தா மேருவே வில்லா
மேவலர் புரங்கள் மூன்றுஎரித்த
கையனே காலால் காலனைக் காய்ந்த
கடுந்தழல் பிழம்புஅன்ன மேனிச்
செய்யனே செல்வத் திருப்பெருந் துறையில்
செழுமலர்க் குருந்தம் மேவியசீர்
ஐயனே அடியேன் ஆதரித்து அழைத்தால்
அதெந்துவே என்று அருளாயே. (56)
மெய்யனே விகிர்தா மேருவே வில்லா மேவலர் புரங்கள் மூன்றுஎரித்த கையனே: மெய்யடியார்களுக்கு உண்மைப்பொருளாய் விளங்குபவனே! மாறுபட்ட பல வடிவங்களை எடுக்கும் அற்புதனே! மேரு மலையையே வில்லாக வளைத்து, பகைவர்களாகிய அசுரர்களின் மூன்று கோட்டைகளையும் எரித்தழித்த கணையை ஏந்திய திருக்கரத்தை உடையவனே!
காலால் காலனைக் காய்ந்த கடுந்தழல் பிழம்புஅன்ன மேனிச் செய்யனே: திருவடி விரலால் எமனை உதைத்து அழித்தவனே! கொழுந்துவிட்டு எரியும் கொடிய தீப்பிழம்பு போன்ற சிவந்த திருமேனியை உடையவனே!
செல்வத் திருப்பெருந் துறையில் செழுமலர்க் குருந்தம் மேவியசீர் ஐயனே: அருட்செல்வம் நிறைந்த திருப்பெருந்துறையில், செழிப்பான மலர்களையுடைய குருந்த மரத்தின் நிழலில் எழுந்தருளிய புகழ்பெற்ற தலைவனே!
அடியேன் ஆதரித்து அழைத்தால் அதெந்துவே என்று அருளாயே: எளிமையேனாகிய அடியேன் உன்னை பேரன்போடு ஆசையோடு கூவி அழைத்தால், 'என் மகனே, அது என்னப்பா?' என்று பரிவோடு கேட்டு அருள்செய்வாயாக!
முத்தனே முதல்வா முக்கணா முனிவா
மொட்டுஅறா மலர்பறித்து இறைஞ்சிப்
பத்தியாய் நினைந்து பரவுவார் தமக்குப்
பரகதி கொடுத்து அருள் செய்யும்
சித்தனே செல்வத் திருப்பெருந் துறையில்
செழுமலர்க் குருந்தம் மேவியசீர்
அத்தனே அடியேன் ஆதரித்து அழைத்தால்
அதெந்துவே என்று அருளாயே. (64)
முத்தனே முதல்வா முக்கணா முனிவா: பிறப்பு இறப்பு எனும் பந்தங்களினின்று முற்றிலும் விடுபட்ட முக்தனே! எல்லாவற்றிற்கும் ஆதிமூலமான முதல்வனே! சூரியன், சந்திரன், அக்னி எனும் மூன்று கண்களை உடையவனே! மௌன யோகத்தில் வீற்றிருக்கும் மாமுனிவனே!
மொட்டுஅறா மலர்பறித்து இறைஞ்சிப் பத்தியாய் நினைந்து பரவுவார் தமக்கு: அரும்புகள் கலக்காத, புதிதாக மலர்ந்த மலர்களைக் கொய்து தூவி வணங்கி, அகத்தே மெய்பக்தியுடன் தியானித்துத் துதிக்கும் அடியார்களுக்கு...
பரகதி கொடுத்து அருள் செய்யும் சித்தனே: உயரிய வீடபேறாகிய முக்தி நிலையை வழங்கி அருள்புரியும் சித்த யோகியே!
செல்வத் திருப்பெருந் துறையில் செழுமலர்க் குருந்தம் மேவியசீர் அத்தனே: அருட்செல்வம் நிறைந்த திருப்பெருந்துறை திருத்தலத்தில், வளமான மலர்களையுடைய குருந்த மரத்தின் நிழலில் எழுந்தருளிய புகழ்பெற்ற எம் தந்தையே!
அடியேன் ஆதரித்து அழைத்தால் அதெந்துவே என்று அருளாயே: எளிமையேனாகிய அடியேன் உன்னை பேரன்போடு ஆசையோடு கூவி அழைத்தால், 'என் மகனே, அது என்னப்பா?' என்று பரிவோடு கேட்டு அருள்செய்வாயாக!
மருளனேன் மனத்தை மயக்கற நோக்கி
மறுமையோடு இம்மையும் கெடுத்த
பொருளனே புனிதா பொங்குவாள் அரவம்
கங்கைநீர் தங்கு செஞ்சடையாய்
தெருளும் நான்மறைசேர் திருப்பெருந் துறையில்
செழுமலர்க் குருந்தம் மேவியசீர்
அருளனே அடியேன் ஆதரித்து அழைத்தால்
அதெந்துவே என்று அருளாயே. (72)
மருளனேன் மனத்தை மயக்கற நோக்கி மறுமையோடு இம்மையும் கெடுத்த பொருளனே புனிதா: அறியாமையில் உழன்ற அடியேனின் மனத்தைப் பிணக்குகளும் மயக்கமும் நீங்குமாறு உற்றுநோக்கி, பிறப்பு-இறப்பு என்னும் இம்மை மறுமைச் சுழற்சிகளை முற்றிலுமாக அழித்த மெய்ப்பொருளானவனே! பரிசுத்தமானவனே!
பொங்குவாள் அரவம் கங்கைநீர் தங்கு செஞ்சடையாய்: சீறிப் பொங்கும் ஒளிமிக்க பாம்பையும், பெருகிவரும் கங்கை நதியையும் தாங்கியுள்ள சிவந்த சடைமுடியை உடையவனே!
தெருளும் நான்மறைசேர் திருப்பெருந் துறையில் செழுமலர்க் குருந்தம் மேவியசீர் அருளனே: தெளிவான நான்கு வேதங்களும் முழங்குகின்ற திருப்பெருந்துறைத் திருத்தலத்தில், வளமான மலர்களையுடைய குருந்த மரத்தின் நிழலில் எழுந்தருளிய புகழ்பெற்ற பேரருளாளனே!
அடியேன் ஆதரித்து அழைத்தால் அதெந்துவே என்று அருளாயே: எளிமையேனாகிய அடியேன் உன்னை பேரன்போடு ஆசையோடு கூவி அழைத்தால், 'என் மகனே, அது என்னப்பா?' என்று பரிவோடு கேட்டு அருள்செய்வாயாக!
திருந்துவார் பொழில்சூழ் திருப்பெருந் துறையிற்
செழுமலர்க் குருந்தம் மேவியசீர்
இருந்தவாறு எண்ணி ஏசறா நினைந்திட்டு
என்னுடை எம்பிரான் என்றென்று
அருந்தவா நினைந்தே ஆதரித்து அழைத்தால்
அலைகடல் அதனுளே நின்று
பொருந்தவா கயிலை புகுநெறி இதுகாண்
போதராய் என்று அருளாயே. (80)
திருந்துவார்பொழில்சூழ் திருப்பெருந் துறையிற் செழுமலர்க் குருந்தம் மேவியசீர் இருந்தவாறு எண்ணி: அழகாகத் திருந்திய பெரிய சோலைகள் சூழ்ந்த திருப்பெருந்துறையில், செழிப்பான மலர்களையுடைய குருந்த மரத்தின் நிழலில் பரம்பொருளாகிய நீ குருவடிவாக எழுந்தருளி இருந்த அப்பெருமையைப் தியானித்து...
ஏசறா நினைந்திட்டு என்னுடை எம்பிரான் என்றென்று அருந்தவா நினைந்தே: பிரிவாற்றமையால் மனம் ஏங்கி உருகி, "என்னுடைய தலைவனே! என் எம்பிரானே!" என்று அரிய தவத்தை மேற்கொள்ளும் தியான மனப்பான்மையோடு...
ஆதரித்து அழைத்தால் அலைகடல் அதனுளே நின்று: அடியேன் உன்னை மிதமிஞ்சிய பேரன்போடு கூவி அழைத்தால், பிறவியாகிய அலைமோதும் இக்கடலினுள்ளே அகப்பட்டுத் தவிக்கும் எனக்கு...
பொருந்தவா கயிலை புகுநெறி இதுகாண் போதராய் என்று அருளாயே: "உனக்குப் பொருந்தும்படியாக, திருக்கயிலாயப் பேரின்ப வீடபேற்றை அடையும் வழி இதுவேயாகும்; என் அருகே வருவாயாக!" என்று வழிகாட்டி அருளிச்செய்வாயாக!